Edozein erakunderen sendotasun ekonomikoa bere funts propioen zenbatekoaren arabera neurtzen da, funtsean. Kooperatiba batean, bazkideek zuzenean inbertitu duten finantza-baliabideen kantitatea (kapital sozialerako ekarpenak) edo kooperatiban bertan atxiki dutena (erreserbetara bideratutako soberakina) ordezkatzen dute funts propioek.

Zorrarekin edo kanpo-finantzaketarekin lotuta ez daudenez, funts propioek aldi baterako arriskuei eta beren jarduerari lotutako konpromisoei aurre egiteko duten gaitasuna zehazten dute. Kooperatiben sendotasun ekonomikoa eta kaudimena bermatzen dute. Coop57ren kasuan, finantza jardueraren arriskua, funtsean, maileguak jaso eta itzuli ezin dituzten erakundeek eragindako berankortasuna da.

Espainiako Estatuko Finantza Etikoen 2023 Barometroak, FETSek eginak, Coop57 kokatzen du printzipio etiko eta solidarioekiko konpromisoaren rankingaren buruan – % 98,5eko betetze-mailarekin –. Espainiako Bankuak gogorarazi du banku konbentzionalen berankortasunaren batez bestekoa % 4,29koa dela. Coop57ren kasuan, % 1,67ra jaitsi da.

• Fundazio-funtsa
Bruguera argitaletxeko langile ohien borrokari esker jarritako funts ekonomikoa da, Coop57 martxan jartzea ahalbidetu zuena.

• Derrigorrezko ekarpenak kapital sozialera
Coop57ko bazkide egiteko pertsona edo erakunde bakoitzak jarri behar duen gutxieneko kapitala. Ekarpen hori itzultzea Kontseilu Errektoreak onartu behar du.

• Mailegu-Funts Solidarioa
Coop57ren mailegu bat jasotzen duten erakunde bazkideek kapital sozialari egindako ekarpenez elikatzen den funtsa.

• Ekitaldiaren emaitza eta erreserbak
Ekitaldi ekonomiko bakoitzeko emaitza positiboak osorik berrinbertitzen dira Coop57n, kooperatibaren kaudimena sendotuz.

Urte honetatik aurrera, jaulkipen honetan harpidetutako borondatezko ekarpenak gehituko zaizkie funts propioei.

[Konparazio taulan ekarpen mota desberdinak azaltzen ditugu]

Azken 4 urteetan, bikoiztu egin da indarrean dauden maileguen saldo biziaren hazkundea (emandako maileguetatik itzuli gabe dagoen zenbatekoa). Bestalde, urte horietan funts propioek izan duten bilakaerak hazkunde erritmo apalagoa izan du, % 30 ingurukoa. Bi aldagai horiek (funts propioak eta maileguen saldo bizia) erlazionatzen direnean, kaudimena eta ezustekoei eta/edo ordainketa faltei erantzuteko gaitasuna neurtzen duen ehuneko bat lortzen dugu.

Komeni da, beraz, kopuru horien artean proportzio on bati eustea. Azken urteetako bilakaera dela eta, komeni da funts propioak indartzea eta handitzea ratio hori hobetzeko eta, horrela, finantza-jarduerari modu sendoan jarraipena emateko eta ekonomia sozial eta solidarioko proiektu eraldatzaileei mailegu gehiago emateko gaitasuna indartzeko.

Testuinguruan jarri ahal izateko eta kanpoko erreferentzia bat izateko: nazioarteko finantza-esparru arautzaileak ezartzen du ratio mota horrek, gutxienez, % 8koa izan behar duela. Jaulkipen honen bidez, ehuneko handiagoa lortu nahi da, eta horrek, jaulkipenaren gehieneko zenbatekoa lortuz gero, Coop57 nazioarteko finantza-araudiaren gutxieneko eskakizunen % 50 gainetik jarriko luke.

Ondorioz, jaulkipen honen arrakastak funts propioetan izango duen eragina esanguratsua izango da Coop57k ekonomia sozial eta solidarioaren finantza-beharrei erantzuna ematen jarrai dezan.

Kapital sozialari egindako borondatezko ekarpenen zenbateko osoa edo zati bat itzultzeko eskatu ahal izango zaio Kontseilu Errektoreari, beti 1.000 €-ren multiploetan, honako epeen barruan:

[2026ko maiatzaren 31 aurretik egindako eskaerak]
•  Aldiak: Urte bakoitzeko urtarrilean, maiatzean eta irailean, hilaren 10. egunera arte.
•  Diru-itzulketa: Dagokion zenbatekoa 60 eguneko epean itzuliko da, Kontseilu Errektoreak horretarako baimena ematen badu.
•  Sortutako interes-ordainsaria ez da jasoko.

[2026ko maiatzaren 31tik aurrera egindako eskaerak]
•  Aldiak: Urte bakoitzeko urtarrilean, maiatzean eta irailean, hilaren 10. egunera arte.
•  Diru-itzulketa: aldi bakoitza itxi eta hurrengo 60 egunetan ordainduko da, Kontseilu Errektoreak horretarako baimena ematen badu.
•  Itzulketaren egunera arte sortutako interes-ordainsaria jasoko da.

Nazioarteko Kontabilitate Arauekin eta Kooperatiben Legearekin bat etorriz, funts propioak indartzeko egindako borondatezko ekarpenak itzultzea Kontseilu Errektoreak onartu behar du, eta organo horrek aukera izango du ekarpen horiek itzultzeari baldintzarik gabe uko egiteko.

Coop57k finantza-jarduera garatzen du bere bazkideen artean, zerbitzu-kooperatiba gisa. Ez da banketxe bat, eta, hortaz, ez du Espainiako Bankuaren Gordailuak Bermatzeko Funtsaren estaldurarik.

Coop57k hainbat mekanismo baliatzen ditu bazkideen ekarpenak bermatzeko:
•  Soberakinak erreserbatara baino ez ditu bideratzen.
•  Finantzaketa jasotzen duten erakundeei kapital sozialari ekarpen gehigarriak egiteko eskatzen die, maileguak bermatuko dituen funts solidario bat elikatzeko.
•  Urtero, egin gabeko ordainketei aurre egiteko horniduretarako ahalik eta gehien esleitzen du.
•   Mugatu egiten du erakunde bazkide bakoitzak jaso dezakeen maileguaren gehieneko kopurua, eta horrela arriskua banatzen du (erakunde batek ezin du maileguetan jaso Coop57k dituen baliabideen % 2 baino gehiago).
•   Hainbat erakunderekin akordioak ditu arriskuak partekatzeko eta emandako maileguak bermatzeko (Europako Inbertsio Funtsa, elkar bermatzeko sozietateak, administrazio publikoak, fundazioak eta Ekonomia Sozial eta Solidarioko beste erakunde batzuk).

Coop57 modu demokratiko eta parte-hartzailean kudeatzen den kooperatiba da, eta hainbat mekanismo baliatzen ditu bazkideek beren egoera ekonomikoa uneoro behar bezala ezagutzeko eta erabakietan kolektiboki parte hartzeko aukera izan dezaten.

NOLA HARPIDETU EKARPENAK? | Web-inprimaki hau beteta. Edo gurekin harremanetan jarriz socis@coop57.coop posta elektronikoz edo 93 268 29 49 telefonora deituz.

NOLA GAUZATZEN DA EKARPENAREN ORDAINKETA? | Ekarpena ordaintzeko, hiru aukera daude: banku-helbideratze bidez, banku-transferentzia bidez edo borondatezko ekarpen galdagarriak Koop57ren kapital sozialera intsuldatuta.

NOLA EGIAZTATZEN DIRA EKARPENAK? | 2025eko urtarrilaren 20tik aurrera Bulego Birtualean eskuragarri egongo den ziurtagiri baten bidez. Ziurtagiri hori eskuragarri egin artean, ekarpenak egin dituzten pertsona guztiek eskaeraren egiaztagiria izango dute, ekarpenaren baldintzen xehetasunekin.

NOLA GAUZATUKO DA ORDAINSARIAREN ORDAINKETA? | Ordainsaria (atxikipen fiskala deskontatu ondoren) kapital sozialari egindako borondatezko ekarpenen balioari gehituko zaio. Hala nahi izanez gero, ordainsariaren zenbatekoa adierazitako kontu korrontean sartzeko ere eska daiteke.

NOLA ESKA DAITEKE EKARPENAK ITZULTZEA? | E-mail bat bidaliz helbide honetara: socis@coop57.coop. E-maila jaso eta gero, bidali duenari itzulketa-formulario bat emango zaio. Coop57ren Bulego Birtualean ere egin daiteke, “Eskaerak” atalean.

Ekarpen horien ordainketa kapital higigarriaren etekintzat hartzen da, eta atxikipen fiskalari lotuta daude ( %19 gaur egun). Ohikoa denez, zerga-araudia zorrotz eta garden betez, Coop57 enpresak betebehar hori atxikitzen du, agintaritza fiskalari ordaintzen dio eta dagokion ziurtagiria ematen du, zerga-aitorpenen zirriborroetan jasota geratzen dena.